政情:Greg苏唔识捞 建制拒护航

  作者:   浏览: [ 298 ] 次

政情:Greg苏唔识捞 建制拒护航

出身民建联嘅Greg苏,入政府前係该党副主席,当初加入政府做副局长时,民建联内部对佢好有期望,之后佢爆出卡片风波,该党亦无条件力撑,无奈几年下来,Greg苏被指过度铁面无私,成日挂住同泛民沟通争取支持,对于建制派、包括一手凑大佢嘅民建联,反而就较为疏离,无乜好嘢益过佢哋。

埋怨苏无帮手拉票

有人甚至认为,前任资讯科技界议员、建制派嘅谭伟豪今届低票落选,其中一个原因亦係Greg苏太过公正无私,无好似某啲政策局长咁,向相关业界组织同选民上下埋手,暗助建制派嘅候选人拉票,令佢哋觉得Greg苏已经唔係「自己人」。

各个政策局喺立法会选举结果公布一刻,已立即开始打电话畀各大建制派,游说佢哋派人加入佢哋嘅对口立会委员会,以便未来四年够人帮手护航,有啲局长更加连委员会主席人选都畀埋意见。据闻Greg苏亦有打电话畀建制派,游说佢哋加入资讯科技委员会同角逐主席,但反应冷淡,Greg苏真係要好好检讨吓,唔通佢欠缺呢届政府好重视嘅政治能力?

需拆几个政治炸弹

资讯科技委员会过去大部分议程都仅与业界有关,重要性一向无政制、保安同教育等事务委员会咁大,但今届却有几个政治炸弹需要处理,例如现已爆发紧嘅香港数码广播停播事件,多名泛民都已讲到明会跟进。另一更敏感嘅,就係增发免费电视牌照事宜,不仅涉及新闻言论自由等政治问题,仲牵涉到多个大财团嘅利益,影响层面更广。建制派呢场大戏,最终会唔会玩出火,会唔会喺重要关头出手相救,答案唔使好耐就会揭盅。

第一手消息请下载on.cc东方互动iPhone/iPad/Android/Windows Phone Apps