政情:Greg苏缩骨 公僕做死

  作者:   浏览: [ 145 ] 次

政情:Greg苏缩骨 公僕做死黎陈芷娟澄清谣传

黎太递信辞职嘅消息寻日传出后,惹起政界官场一阵骚动,即使食衞局严词否认「绝无其事」,仍未能抚平骚动。寻日,黎太如常出席立法会审议「限奶令」小组委员会,甫现身即时成为传媒追访目标,但佢就重申绝无辞职呢回事,又话传闻无根据。被问近排处理「限奶令」係咪好大压力,黎太就话政府都係全心全力服务市民,最大希望係透过法律保障香港婴儿有足够奶粉用。

寻日委员会上唔少议员见黎太做到咁辛苦,都不忘纷纷鼓励吓佢。新民主同盟范国威就鼓励黎太话推限奶令天经地义,仲话希望黎太深思一下係咪真係要辞职,博得黎太一笑。而民主党单仲偕就话戥黎太唔抵,事关过往香港出现食米供应问题都係商务及经济发展局主理,不过唔知点解今次唔见Greg苏出现。黎太就大方回应话,今次限奶令归食衞局主导「绝对唔係问题」,事关该局对食物供应有政策责任。

事实上,Greg苏「消失官场」嘅微言喺政界官场都出现咗一段时间,对上一次见报好似要数到佢带个新政助陈百里去立法会招摇「苏」off。不过讲到做正经事,就好似总係唔多觉佢嘅身影。例如近日嘅港台风波摆明係政治事件,但Greg苏就唔知去咗边。想问Greg苏免费电视牌照几时会发,亦唔知去边搵佢。听闻唔少官中人都对Greg苏今次喺「限奶令」一役缩骨唔落水唔多满意,今次传出公务员做到爆煲递信,兇手是谁相当明显。

第一手消息请下载on.cc东方互动iPhone/iPad/Android/Windows Phone Apps